مقالات و تحليلات

بقلم د. امل طعان جفال مديرة البيئة والتنمية في نقابة الغواصين المحترفين في لبنان.

1 . الموقع: قلب الجنوب النابض

على تلال مشرفة على سهل بنت جبيل ووادي الحاصباني، قاعدة النبطية متل التاج. عاصمة محافظة النبطية وقلب جبل عامل. طريقها بيوصل صور بصيدا ببنت جبيل بمرجعيون... لهيك صارت محطة التجار والعلماء من مئات السنين.

2 . مدينة العلم والعلماء

النبطية مصنع عقول. الولد فيها يتربى على الكتاب قبل المصاري. مدارسها قديمة، وجامعاتها اليوم بتجمع طلاب الجنوب كله. من هون طلعوا شعراء وكتّاب ومفكرين رفعوا راسنا.

3 . ابنها اللي غيّر العالم: حسن كامل الصباح

فخر النبطية للدنيا كلها. ابن حاراتها اللي طلع بأميته ليوصل لمخابر أمريكا. 176 براءة اختراع، وصاحب فكرة التلفزيون الملون. عقل نبطي من بين الحجر سبق عصره.

4 . الآثار اللي بتحكي تاريخ

قلعة الشقيف بوفور: واقفة على صخرة 700م، شايفة فلسطين والجولان. رمز صمود قبل ما تكون أثر.

خان النبطية العثماني: بقلب المدينة، قناطره الحجرية بعدها شامخة رغم كل شي.

البيوت الحجرية: عقود وأقواس وشبابيك مشغولة بالإيد، كل حيط فيها حكاية.

جسر العديسة الروماني: بعدو واقف رغم السيول والحروب، شاهد على طريق التجارة القديم.

5 . السوق والطعم اللي ما بينتسى

مين بينسى سوق الإثنين؟ صوت البيّاعين، ريحة القماش، والذهب اللي بيلمع. وبعد كل هالتعب... المحطة الثابتة: حلويات الديماسي. بقلاوة سخنة وهريسة بالقشطة تذوب بالتم وكاسة شاي. هيك كانت النبطية تكافئك.

6 . الوجع... والوعد

العدو دمر الأسواق وحرق التراث وحرمنا نرجع عاليوق نتحلى. بس ما قدر يموت الحجر ولا يموت العقل النبطي.

النبطية وعد. وعد إنو رح نرجع، نعمر القلعة والخان والبيوت، يرجع سوق الإثنين، ويرجع ولادنا ع مقاعد الدرس متل ما قعد حسن كامل الصباح.

ورح نوقف قدام الديماسي ونقول: "عطيني كيلو شوق مع البقلاوة"

ورح نرجع نتحلى باليوق بعد التسويق... غصب عن كل عدو.